Mai Martaba Sarkin Kano, Muhammadu Sanusi II, ya yi gargaɗin cewa yawan cin bashin da almubazzarancin kuɗaɗen gwamnati na iya kawo cikas ga ɗorewar tattalin arziƙin Nijeriya.
Sanusi ya ce biyan bashin da Nijeriya ke yi ya cinye kashi 124 cikin 100 na kuɗaɗen shigar Gwamnatin Tarayya a farkon rabin shekarar 2026, kamar yadda alkaluman Bankin Duniya suka nuna.
Da yake magana a wani taro a Abuja ranar Talata, ya buƙaci gwamnati ta rage kashe kuɗaɗen da ba su da muhimmanci, tare da mayar da hankali kan ɓangarorin wutar lantarki, noma, hanyoyi da fasaha.
Ya amince cewa an samu wasu ci gaba a tattalin arziƙin ƙasar, ciki har da rage hauhawar farashin kayayyaki daga sama da kashi 30 zuwa kashi 14.5, da kuma ƙaruwar kuɗaɗen ajiyar ƙasashen waje zuwa dala biliyan 55.
Sai dai ya ce har yanzu da yawan daga cikin’yan Nijeriya ba su ga amfanin sauye-sauyen tattalin arziƙin ba.
Sanusi ya kuma buƙaci gwamnati ta riƙa sauraron ƙorafe-ƙorafen jama’a dangane da batun talauci da tsadar rayuwa, maimakon ɗaukar su a matsayin suka game da shugabancinta.
A nasa ɓangaren, ɗan kasuwa Atedo Peterside ya ce Nijeriya na buƙatar bunkasar tattalin arziƙi cikin sauri domin samar da ayyukan yi da inganta rayuwar al’umma.
Shi ma tsohon shugaban Bankin Raya Ƙasashen Afirka, Akinwumi Adesina, ya buƙaci a ƙara zuba jari a fannin fasahar (AI) domin bunƙasa tattalin arziƙin Afirka.
