Malaman addinin Musulunci a birnin Zariya, Jihar Kaduna, sun yi kira ga hukumomin tsaro da su kara zurfafa bincike kan kisan gillar da aka yi wa marigayi Sheikh Masussuka, tare da tabbatar da gano wadanda suka aikata laifin da kuma hukunta su bisa doka.
An kashe Sheikh Masussuka ne a ranar Litinin, 26 ga watan Oktoba, 2026, lamarin da ya janyo damuwa a tsakanin malaman addinin Musulunci da sauran al’ummar musulmi.
Malaman sun kuma bukaci hukumomin tsaro da su yi amfani da sabbin dabarun bincike na zamani, tare da karfafa matakan tsaro domin hana sake aukuwar hare-hare kan malaman addini da sauran manyan mutane a cikin al’umma.
Da yake magana kan lamarin, Sheikh Umar Sambo, Limamin Masallacin Juma’a na Hayin Dogo Samaru, ya bayyana damuwarsa kan yadda ake ci gaba da kashe fitattun malaman addinin Musulunci, ba tare da daukar kwararan matakan kamo wadanda ke aikata irin wadannan laifuka ba.
Ya koka da cewa kashe malaman addini na kara zama abin damuwa, inda ya jaddada cewa wajibi ne jami’an tsaro su wuce matakin rubuta rahotannin faruwar irin wadannan al’amura, su tabbatar da gano wadanda ke da hannu tare da gurfanar da su a gaban kuliya.
“Wadannan ba su ne karo na farko ko na biyu da ake kashe fitattun malaman addinin Musulunci ba, amma har yanzu ba mu ga an dauki kwararan matakan kamo wadanda ke aikata wadannan laifuka da gurfanar da su a gaban shari’a ba.
“Lokaci ya yi da za a daina danganta irin wadannan hare-hare da wasu ‘yan bindiga da ba a san ko su wanene ba, ba tare da an yi kokarin gano su ba. Ya kamata jami’an tsaro su yi amfani da dukkanin fasahohin zamani da hanyoyin bincike da suke da su domin tabbatar da cafko wadanda suka aikata laifin,” in ji shi.
A nasa bangaren, wani malamin addinin Musulunci a Zariya, Alaramma Lukman Alfa, ya yi kira da a rungumi hakuri, juriya da zaman lafiya tsakanin musulmi, ba tare da la’akari da bambance-bambancen fahimtar addini da ke tsakaninsu ba.
Ya bayyana cewa babu wanda ya kamata a gallaza wa ko a kai masa hari saboda akidarsa ta addini, inda ya bukaci al’umma da su mutunta juna tare da warware sabanin da ke tsakaninsu ta hanyar tattaunawa cikin lumana.
Ya ce, “Ya kamata mu rika hakuri da juna ba tare da la’akari da bambance-bambancen da ke tsakaninmu ba. Bai kamata a gallaza wa wani ko a kai masa hari saboda akidarsa ba.”
Sauran malaman da suka yi magana kan lamarin sun bayyana alhininsu bisa yadda rayuwar Sheikh Masussuka ta zo karshe, inda suka bayyana rasuwarsa a matsayin babban rashi ga al’ummar Musulmi.
Sun kuma bukaci hukumomin da abin ya shafa da su gudanar da cikakken bincike kan lamarin, su tabbatar da an hukunta wadanda suka aikata laifin, tare da daukar matakan da suka dace domin kare rayukan malaman addini da sauran al’umma.
