Hukumar Ƙwallon Ƙafa ta Portugal (FPF) ta fara ƙoƙarin sasanta rikicin da ya kunno kai tsakanin kyaftin ɗin tawagar ƙasar, Cristiano Ronaldo, da kocinta, Jorge Jesus.
Rikicin ya biyo bayan barin sansanin horar da tawagar Portugal da Ronaldo ya yi ba zato ba tsammani, lamarin da ya janyo cece-kuce kan makomar ɗan wasan da kuma ko zai ci gaba da wakiltar ƙasarsa bayan shafe shekaru 23 yana taka mata leda.
A cewar rahoton jaridar Marca ta Spain, wanda Leadership Hausa ta fassara, jami’an FPF na shirin ganawa da Ronaldo a mako mai zuwa domin lalubo hanyar sasanta shi da kocin tawagar.
An ruwaito cewa Ronaldo ya bar sansanin horar da Portugal da ke birnin Copenhagen a tsakiyar makon da ya gabata, bayan Jorge Jesus ya sanar da shi cewa ba zai kasance cikin ‘yan wasan da za su kara da Denmark a ranar Alhamis ba.
Rahoton ya ce FPF na ƙoƙarin dawo da kyakkyawar alaƙar da ke tsakaninta da Ronaldo tare da warware taƙaddamar da ta kunno kai tsakaninsa da kocin.
Hukumar na fatan cewa rikicin ba zai kai ga Ronaldo ya kawo ƙarshen wakiltar Portugal ba, musamman ganin irin gagarumar gudunmawar da ya bayar wajen samun nasarorin tawagar ƙasar a tsawon shekaru 23 da ya shafe yana wakiltarta.
Jami’an hukumar sun yi imanin cewa rabuwa da Ronaldo cikin yanayin da bai dace ba, ba zai zama abin da ya fi dacewa ga kowane ɓangare ba, don haka suke ƙoƙarin ganin an warware matsalar cikin lumana.
