Kamfanoni da dama na kasar Sin da ke kasuwar hannun jari sun ba da rahoton cewa, sun karbi kudaden haraji tare da kudin ruwa da aka maido masu daga Amurka tun daga farkon watan Yuli. Wannan ya biyo bayan matakin da Amurka ta dauka ne na maido da kudaden harajin kwastam da aka kakaba a karkashin dokar nuna karfin iko ta gaggawa da ta shafi tattalin arzikin kasa da kasa, watau IEEPA a takaice.
An maido da kudaden ne sakamakon hukuncin da kotun koli ta Amurka ta yanke a ranar 20 ga watan Fabrairun da ya gabata cewa, manufofin haraji na shugaba Donald Trump a karkashin dokar IEEPA sun saba wa tsarin mulki. Matakan harajin na gaban-kai sun fuskanci korafe-korafe da adawa daga cikin gida da wajen kasar, tare da nuna damuwar cewa sun keta dokokin kasuwanci na kasa da kasa da kuma ruguza tsarin kasuwancin duniya.
Wata takardar kotu ta bayyana cewa, zuwa karshen watan Yuli, gwamnatin Trump ta maida kusan dala biliyan 100 na kudaden haraji ga ’yan kasuwar Amurka masu shigo da kayayyaki. Sannan ana kyautata zaton hukumar kwastam da tsaron iyakoki ta Amurka (CBP) za ta maido da jimillar kudaden haraji na IEEPA da ta kai dala biliyan 175, kamar yadda rahoton kintace da sashen nazarin kasafin kudi na gwaji na Penn Wharton da ke tsangayar Wharton ta jami’ar Pennsylvania ta fitar a baya ya nuna. (Abdulrazaq Yahuza Jere)
