Gwamnatin Tarayya ta raba sama da Naira biliyan 48 ga masu ƙaramin ƙarfi a Jihar Kano ƙarƙashin shirin HoPE-CT.
Ministan Harkokin Jin Kai da Rage Talauci, Bernard Doro, ne ya bayyana hakan yayin wata ziyara da ganawa da waɗanda suka amfana da shirin a makarantar firamare ta Unguwa Uku Model da ke ƙaramar hukumar Tarauni a Jihar Kano.
Ya ce tallafin ya shafi dukkan ƙananan hukumomi 44 na jihar, inda aka raba jimillar N48,130,875,000 a matakai uku.
Bayanin yadda aka raba kuɗin ya nuna cewa kason farko ya kai Naira biliyan 19.6, na biyu ya kai biliyan 14.5, yayin da na uku ya kai biliyan 13.9, inda kowane wanda ya ci gajiyar shirin ya samu har Naira 75,000.
Doro ya ce manufar ziyarar ita ce duba tasirin shirin tare da tattaunawa kai tsaye da waɗanda suka amfana domin tabbatar da cewa shirye-shiryen gwamnati na haifar da sakamako mai ma’ana.
