Mataimakin firaministan kasar Sin He Lifeng, ya yi kira da a gaggauta kokarin samun nasarori a fannin jigon fasahohi, da gaggauta gina tsarin masana’antu na zamani, da samar da sabbin hanyoyin bunkasa tattalin arziki.
He Lifeng ya bayyana haka ne yayin rangadin da ya yi a lardin Sichuan na kudu maso yammacin Sin, inda ya ziyarci biranen Chengdu da Deyang da Mianyang. He Lifeng wanda kuma mamba ne na ofishin siyasa na kwamitin kolin JKS, ya ziyarci kamfanoni da masu samar da injunan kera kayayyaki da ke amfani da ingantattun fasahohi na musamman wajen samar da sabbin kayayyaki da kayayyaki na musamman, da jin labaransu na kirkire-kirkiren fasaha da yadda suke fitar da kayayyaki kasashen ketare da yadda suke gudanar da ayyuka. Ya kuma ziyarci cibiyar jigila ta tashar kan tudu, domin duba yanayin ayyukansu.
Bugu da kari, ya kuma jaddada muhimmancin amfani da rawar da manyan fasahohi da kayayyaki gami da ayyukan injiniyanci suke takawa, da kara cimma nasarori a muhimman jigon fasahohi, da kara dogaro da kai da karfi a bangaren kimiyya da fasaha, da inganta juriya da tsaron tsarin ayyukan masana’antu da na samar da kayayyaki, da kuma kyautata hidimtawa manyan dabarun kasa. (Fa’iza Mustapha)
