Farashin shigo da litar fetur (PMS) zuwa Njeriya ya sauka zuwa N983.92 a ranar 24 ga Yuni, 2026, lamarin da ya sanya ya yi ƙasa da farashin da Matatar Dangote ke sayarwa daga matata wanda ya kai N1,125 kan kowace lita.
Bayanai daga Major Energies Marketers Association of Nigeria (MEMAN) sun nuna cewa raguwar farashin na nuni da sauƙin da aka samu a kasuwar shigo da fetur cikin ɗan gajeren lokaci, duk da cewa matatar Dangote na ci gaba da sayar da fetur a farashi mafi tsada.
A cikin rahoton makamashi da MEMAN ta fitar ranar Laraba, 24 ga Yuni, ƙungiyar ta bayyana cewa farashin shigo da fetur ya tsaya a N983.92 kan lita ta hanyar ASPM, yayin da ta hanyar NPSC-NOJ ya kai N982.92.
Rahoton ya ce saukar farashin ya samo asali ne daga canje-canjen da aka samu a kasuwar duniya. Sai dai kuma farashin da Matatar Dangote ke sayarwa daga matata ya zarce wannan da kusan N141.08 kan kowace lita, yayin da farashin jigilar teku ya kasance N1,065 kan lita.
MEMAN ta kuma bayyana cewa matsakaicin farashin shigo da fetur na kwanaki 30 ya kai N1,138.20 kan lita, wanda ya fi farashin matatar Dangote kaɗan.
A lokaci guda, ana musayar naira kan kusan N1,367.26 kan kowace dala, abin da ke ci gaba da tasiri wajen ƙayyade farashin shigo da man fetur.Game da dizal, MEMAN ta ce Matatar Dangote na sayar da shi kan N1,500 a kowace lita, yayin da farashin shigo da shi na kwanaki 30 ya kai N1,487.71, kuma farashin nan take ya tsaya a N1,213.44 kan lita.
Man jiragen sama kuwa ana sayar da shi kan N1,450 a matatar Dangote, yayin da farashin shigo da shi ya kai N1,201.23 kan lita. Haka kuma, iskar gas (LPG) ana sayar da ita kan N925,000 a kowace metric tonne. MEMAN ta ƙara da cewa Nijeriya har yanzu ita ce ƙasar da ke da mafi ƙarancin farashin fetur a Yammacin Afirka, inda farashin ya kai N1,208 kan lita, ƙasa da farashin da ake samu a ƙasashe irin su Benin, da Ghana, da Togo, da Liberia, da Kamaru, da Côte d’Ivoire, da Mali, da Senegal da Sierra Leone.
