A ranar Juma’ar da ta gabata, aka kaddamar da Kimi K3, wani samfurin kirkirrarriyar basira ta AI da kamfanin Moonshot AI na kasar Sin ya samar, wanda ya zama wata sabuwar nasara a fannin raya AI mai budadden tsari. Wannan nasara ta zo a daidai lokacin da Sin ta fara karbar bakuncin babban taron duniya kan AI da tsarin shugabancin duniya a bangaren amfani da AI.
Yayin taron, ra’ayin da shugaban kasar Sin Xi Jinping ya gabatar kan dabarar kirkirarriyar basira ta AI shi ne, samar da fasahar AI mai mayar da hankali kan bukatun jama’a, wadda za a amince da ita, dake karkashin sarrafawar dan adam, kuma fasaha mai amfani da amfanar da kowa.
Ra’ayin ya samu karbuwa a wajen mahalarta da ma sauran al’ummar duniya, kuma ya nuna yadda Sin ke son fasahar mai saurin bunkasa ta zama wadda kowa zai amince da ita, ya kuma amfana, musammam kasashe masu tasowa da ke zama koma baya a duk lokacin da duniya ta samu wani sabon abu.
A ganina, gibin da ake samu tsakanin kasashe manya da masu tasowa da ma yadda kasashe masu tasowa ke kasancewa a baya a duk lokacin da aka samu sabon abu, ya kusa zama tarihi, saboda kasar Sin tana gaba gaba a bangaren raya fasahar AI, kuma ita mai son tafiya ne tare da kasashen duniya ta yadda za a samu ci gaba da makoma ta bai daya ba tare da ware wani bangare ba.
Samfurin AI na Kimi K3 da kamfanin Sin ya samar, samfuri ne mai budadden tsari mafi girma a duniya. Haka kuma, ya shiga cikin tsare-tsaren AI dake kan gaba a duniya. Wannan na nufin sabanin irin wadanda tsare-tsarensu a rufe yake, ya samar da fasahar cikin rahusa ko kyauta ta yadda za a iya sauya tsarinta bisa bukatun da ake da su.
Karfin kasar Sin a bangaren fasahar AI ba zai iya misaltuwa ba, kuma irin wannan budadden tsari da za a iya aiwatar da sauye-sauye a cikinsa domin su dace da bukatun da ake da su, ya dace da ra’ayin da shugaban ya gabatar yayin bude taron duniya kan AI.
Ta wannan tsari, za a iya sanya harsuna da yanayi da tsare-tsare da bukatu daban daban, ta yadda za su dace da mabambantan kasashe ko yankuna ko al’ummomi. Kuma zai iya bayar da hidimomi a bangarorin bayar da ilimi, gargadin yanayi da ayyukan gona da kiwon lafiya da duk wani abu da aka ba shi horo kai domin biyan bukatun al’umma.
Da irin wannan AI mai budadden tsari na kasar Sin, kasashe masu tasowa, musamman kasashen Afrika, ba zama masu amfani da fasahar kadai za su yi ba, za su samu damarmakin tsara fasahar, ta yadda za ta hidimtawa al’ummominsu, kuma kowa zai iya cin gajiyarta a duk inda yake cikin sauki.
Watau dai, su ma ba za a bar su a baya ba, za su shiga cikin jerin kasashen duniya masu cin gajiyar fasahar ta zamani. (Fa’iza Mustapha)
