Hukumar Kula da Abinci da Magunguna ta Kasa (NAFDAC) ta tsananta ayyukan tabbatar da doka a Jihar Legas, inda ta bankaɗo jabun kayan shaye-shaye masu saurin bugarwa, da gurbatattun kayan abinci, da kuma yin amfani da manyan motocin dakon mai (tankers) ta hanyar da ke barazana ga lafiyar jama’a.
Yayin da yake jawabi ga manema labarai game da wadannan sumame, Daraktan Bincike da Tabbatar da Doka na hukumar, Dr. Martins Iluyomade, ya bayyana cewa wannan kame na nuni da kudurin NAFDAC na kare lafiyar ‘yan kasa ta hanyar tabbatar da cewa kayayyaki masu kyau da amintattu ne kawai ke shiga kasuwa.
Badaƙalar Motocin Man Girki Da Aka Loda Wa Dizal
Ɗaya daga cikin manyan nasarorin da hukumar ta samu shi ne tsare wasu manyan motoci guda biyu waɗanda aka keɓe na musamman domin jigilar man girki na alayyahu (edible vegetable oil), amma aka kama su maƙare da man dizal (Automotive Gas Oil).
Dr. Iluyomade ya jaddada cewa wannan babban laifi ne da ke da haɗari mai yawa ga lafiyar abinci da bil’adama.
Yayin tambayoyi, manajan motocin ya yi da’awar rashin sanin dokar alamomin launi (colour-coding) da aka tanada don motocin man girki, sannan ya amsa cewa a baya ma ana amfani da motocin ne wajen jigilar dizal kawai.
An tsare motocin da ma’aikatansu yayin da ake ci gaba da bincike.
Ƙera Jabun Giya
Hukumar ta kuma ruguza wasu masana’antun ɓoye guda biyu da ke ƙera jabun kayan shaye-shaye masu saurin bugarwa a yankin Mushin na Jihar Legas. Wannan sumame ya kai ga kama mutane biyu da ake zargi: Mr. Uchenna Ekezie da Mr. Peter Okparalgbo.
An kwato ɗimbin jabun kwalaben giya na shahararrun kamfanoni na gida da na ƙasashen waje daga shaguna da wuraren ajiyar da suke amfani da su.
Dr. Iluyomade ya shaida da cewa NAFDAC za ta ci gaba da sanya ido da gudanar da sumame a faɗin ƙasar nan, kuma yana kira ga jama’a da su rika siyan kayayyaki a wurare amintattu tare da kai rahoton duk wani motsi na zargi ga ofishin NAFDAC mafi kusa.
