Yau Lahadi, kungiyar kula da sana’o’i masu aiki da karfin makamashin nukiliya ta kasar Sin ta ba da takardar bayani game da bunkasuwar makamashin nukiliya na kasar a shekarar 2025, inda takardar ta ce, ya zuwa yanzu, yawan na’urorin samar da wutar lantarki masu aiki da makamashin nukiliya da Sin take da su ko take kafawa ya kai 102, kuma yawan wutar lantarki da suke iya samarwa ya kai KW miliyan 113, adadin da ya kai matsayin farko a duniya.
Ya zuwa yanzu, yawan na’urorin samar da wutar lantarki masu aiki da makamashin nukiliya da Sin take kafawa ya kai 28, kana yawan wutar lantarki da za su samar ya kai KW miliyan 33.65, adadin da ya kasance na farko a duniya cikin shekaru 18 a jere.
- Kungiya Ta Bai Wa Marayu Tallafin Atamfofi Da Shaddodi A Yobe
- Gobara A Haramtacciyar Wurin Ajiye Man Fetur Ta Ci Rayukan Mutane 5 A Jihar Ribas
Dadin dadawa, yawan wutar lantarki da aka samar ta aiki da makamashin nukiliya ya karu matuka a kasar Sin. A shekarar bara, yawan wutar lantarki da aka samar daga makamashin nukiliya ya kai KW biliyan 444.7, adadin da ya kai 4.72% bisa jimillar wutar lantarki da aka samar baki dayan kasar Sin, kuma wannan adadi ya zama na 2 a duniya, kwatankwacin rage aiki da kwal da yawansa ya kai ton miliyan 127, wato rage fitar da iskar cabon dioxide ton miliyan 334.
Ban da karuwar yawan wutar lantarki da aka samar ta aiki da makamashin nukiliya, karfin kasar Sin na yin kirkire-kirkire da kanta a wannan bangare ya kyautata matuka. A shekarar bara, Sin ta samar da dukkan muhimman sassan na’urorin samar da wutar lantarki masu aiki da makamashin nukiliya ta hanyar dogaro da kanta.(Amina Xu)
