A filin jirgin sama na kasa da kasa na Ejin Horo dake birnin Ordos na jihar Mongolia ta gida mai cin gashin kanta, a daren ranar Lahadi 23 ga watan nan, Ba’amurka da ya bakunci garin mai suna “Salkowski” (sunansa na ainihi shi ne Ronald Salkowski), da jarumar kasar Sin mai yaki da hamada Yin Yuzhen sun rungume juna da karfi, suna zubar da hawaye don farin ciki.
A shekara ta 1999, malami Ba’amurka da ke koyarwa a Sin wato “Salkowski” ya ji labarin yadda Yin Yuzhen ta yi iyakacin kokari a hamadar Mu Us, don magance hamada da kuma dashen bishiyoyi, kuma ya tara dalar Amurka 5,000 don taimakawa Yin Yuzhen.
Yanzu haka, bishiyoyin da aka dasa da wannan kudi kyauta, sun girma zuwa itatuwa sama da 50,000. A watan Mayu na bana, Yin Yuzhen ta nemi tuntubar “Salkowski” ta hanyar fitar da bidiyo a duk fadin yanar gizo, kuma daga karshe dai ta cimma nasarar samun “Salkowski” wanda yake da zama a Amurka. Wannan abota da ta ratsa tekun Pasifik, ta zama alama mai rai ta musayar zumunci tsakanin al’ummomin Sin da Amurka.
Jama’ar Sin da Amurka su ne tushen dangantakar kasashen biyu. Saduwar Yin Yuzhen da “Salkowski” bayan sama da shekaru 20 ta kara dumama dangantakar Sin da Amurka. Abin da ya shaida cewa, musayar al’adu da tuntubar al’umma su ne tushen dangantakar Sin da Amurka. Abota da hadin gwiwa tsakanin Sin da Amurka suke faranta ran jama’a. Wani binciken ra’ayin jama’a, da cibiyar bincike ta Pew ta Amurka ta fitar a watan Afrilu na bana, ya nuna cewa, adadin jama’ar Amurka dake ganin Sin da kyau ya “kusan ninkawa” a cikin shekaru 3 da suka gabata.
Rahoton da cibiyar harkokin duniya ta Chicago ta fitar a watan Agusta, ya nuna cewa kashi 59% na Z-generation (mutanen da aka haife su daga shekarar 1995 zuwa ta 2009), da kashi 58% na millennials (mutanen da aka haife su daga shekarar 1981 zuwa ta 1996) sun yarda da tuntuba tare da Sin.Al’ummar Sin da Amurka ne suka ciyar da abotar bangarorin biyu gaba.
A ranar 24 ga watan, “Salkowski” da Yin Yuzhen sun dawo hamadar Mu Us tare, inda suka dasa dauwwamanmun bishiyoyi 3 da ke wakiltar abota. Abin da suka dasa ba bishiyoyi ce kawai ba, a’a, abota ce da ta wuce iyakokin kasa da zamani. (Amina Xu)
