Wasu magoya bayan takarar Farfesa Isa Ali a matsayin gwamnan Jihar Gombe sun zargi ana yi wa kamfanin sufuri na Gombawa Motors musgunawar siyasa bayan an umarce shi da ya fice daga Ibrahim Dankwambo Mega Park cikin sa’o’i 24.
Kamfanin ya ce matakin ya biyo bayan goyon bayan da ya bayyana wa tafiyar siyasar Pantami gabanin zaɓen 2027. Shugaban kamfanin, Alhaji Ibrahim Mustafa, ya ce haya da motocinsu ga jam’iyyu da sauran masu buƙata kasuwanci ne na halal, yana mai jaddada cewa Kundin Tsarin Mulki ya ba su ‘yancin zaɓar wanda za su mara wa baya.
Sai dai shugaban Gombe Mega Park, Dakta Sani Sabo, ya musanta zargin siyasa, yana cewa an kori kamfanin ne saboda karya ƙa’idojin gudanar da ayyuka da kuma rashin bin umarnin hukumomin gudanarwar filin duk da gargaɗi da aka yi musu sau da dama.
Lamarin ya ƙara ɗaukar hankalin jama’a a Jihar Gombe, inda wasu ke ganin lokacin da aka ɗauki matakin na da alaƙa da siyasa, yayin da mahukuntan Mega Park ke dagewa cewa sun aiwatar da ƙa’idojin gudanarwa ne ba tare da la’akari da alaƙar siyasar kowa ba.
