A jiya Asabar, manzon musamman na shugaban kasar Sin Xi Jinping, kana shugaban hukumar wasannin motsa jiki ta kasar Sin, Mista Gao Zhidan, ya halarci bikin kaddamar da wasannin Olympics na matasa karon 4, a birnin Dakar na kasar Senegal. Kuma ya gana da shugaban kasar Senegal Bassirou Faye kafin bikin.
Yayin ganawar, Mista Gao ya mika wa shugaba Faye gaisuwa da fatan alheri daga shugaba Xi Jinping. Haka kuma, ya ce kasar Sin na fatan ganin an karfafa hadin gwiwa tare da bangaren Senegal, bisa huldar kasashen 2 ta abokai da suke hadin kai da juna, bisa manyan tsare-tsare a dukkan fannoni.
A nasa bangare, shugaba Bassirou Faye na kasar Senegal, ya bayyana godiya ga shugaba Xi, bisa aikewa da manzonsa don halartar bikin kaddamar da wasannin Olympics na matasa na wannan karo. Ya kara da cewa, kasar Sin daya ce daga cikin abokan hulda mafiya muhimmanci ga Senegal, kuma yana godiya bisa goyon bayan da shugaba Xi da gwamnatinsa suka dade suna baiwa bangaren Senegal, a fannonin raya tattalin arziki da zamantakewar al’umma, musamman ma a fannin karbar bakuncin wasannin Olympics na wannan karo.
A jiya Asabar da dare ne aka kaddamar da wasannin Olympics na matasa karo na 4 a kasar Senegal, wanda ya kasance karon farko da gasar za ta gudana a nahiyar Afirka. Za a ci gaba da gudanar da gasar har zuwa ranar 13 ga watan Nuwamban nan, kana kasar Sin ta tura wata tawaga mai kunshe da mutane 121, ciki har da ‘yan wasa 66, domin halartar gasar wasannin. (Bello Wang)
