Tsohon Gwamnan Jihar Kogi, Yahaya Bello, ya ce zai koma Kano na tsawon makonni biyu domin tabbatar da samun goyon baya ga Shugaba Bola Tinubu da Gwamna Abba Kabir Yusuf gabanin zaɓen 2027.
Ya bayyana hakan ne a wani taron ƙarfafa gwiwa na Leke Abejide Foundation da aka gudanar a Kano. Tsohon Gwamnan ya kuma yi kira ga al’ummar Yarabawa da sauran al’ummomin da ba ƴan asalin jihar ba su haɗa kai su goyi bayan jam’iyyar APC.
Yahaya Bello ya ce a shirye yake ya shiga aikin yaƙin neman zaɓe fiye da yin magana kawai. Ya ƙalubalanci al’ummomin su nuna ƙarfinsu na siyasa, yana mai cewa ƙuri’u kusan 500,000 da aka samu a 2023 ba su isa ba. Ya ce hanyoyin da ɗan majalisar wakilai Leke Abejide ke da su za su iya tattara aƙalla ƙuri’u miliyan biyu ga Tinubu, sannan ya buƙaci goyon baya ga dukkan ƴan takarar APC.
Bello ya yi kira ga mutanen Arewa da su goyi bayan sake zaɓen Tinubu, yana mai cewa ya kamata a bar shugaban ya cika wa’adin da kundin tsarin mulki ya ba shi na sau biyu. Ya ce bayan shekaru takwas na Shugaba Muhammadu Buhari wanda ya fito daga Arewa, Tinubu bai ma kammala wa’adinsa na farko ba. Ya kuma ƙare ayyukan gwamnatin Tinubu, musamman ci gaban da aka samu a hanyar Kano zuwa Abuja.
A nasa jawabin, Leke Abejide ya ce Kano gidansa ne, inda ya zauna ya kafa kasuwancinsa na kusan shekaru 34. Ya ce shirin nasa wata hanya ce ta mayar da alheri ga mutanen da ya girma tare da su kafin ya shiga siyasa.
An ware naira miliyan 500 a matsayin rance maras riba ga mata cikin ƙungiyoyin haɗin gwiwa, ciki har da matan Yarabawa daga jihohi takwas, da al’ummomin Igala da Ebira mazauna Kano.
Gwamna Abba Kabir Yusuf ya sake jaddada jajircewar gwamnatinsa na kare haƙƙin al’ummomin da ba ƴan asalin jihar ba da tabbatar da shigarsu cikin harkokin mulki. Ya ce an naɗa masu ba da shawara na musamman ga al’ummomin Yarabawa, da Igbo da ƴan tsirarun Arewa, ana kuma la’akari da ba da irin wannan wakilci ga Igala.
Ya kira su da su goyi bayan Tinubu da ƴan takarar APC, sannan ya yaba wa Abejide bisa faɗaɗa ayyukan alhernsa.
