Gwamnatin Tarayya ta ƙaddamar da sabon tsarin neman lamuni mai suna SPARK, wanda zai bai wa ’yan Nijeriya damar samun lamunin kuɗi ta wayar hannu ba tare da buƙatar intanet ko wayar zamani ba.
Kamfanin Nigerian Consumer Credit Corporation (CREDICORP) ne ya ƙaddamar da tsarin, musamman domin taimaka wa mutanen da ba su taɓa karɓar lamuni a hukumance ba ko kuma ba su da tarihin karɓa da biyan bashi. Masu sha’awar amfani da tsarin za su iya danna lambar *347*333# a wayoyinsu domin fara amfani da shi.
A cewar CREDICORP, tsarin SPARK zai sauƙaƙa wa mutane samun lamuni, tare da taimaka musu wajen gina tarihin yadda suke karɓar bashi da kuma biyan sa a kan lokaci. Kamfanin ya ce yin hakan zai iya inganta matsayin masu karɓar lamunin a tsarin hada-hadar kuɗi, tare da buɗe musu ƙarin damar samun tallafin kuɗi a nan gaba.
An ƙaddamar da tsarin ne a wajen wani taron CREDICORP mai suna ‘CREDICORP for All’ da aka gudanar a Aba, Jihar Abia. Taron ya haɗa da mazauna yankin sama da 1,000, da cibiyoyin hada-hadar kuɗi, ƴan kasuwa da jami’an gwamnati, inda aka nuna yadda bashi zai taimaka wa mata ƴan kasuwa, matasa da masu sana’o’in sufuri.
Babban Daraktan CREDICORP, Uzoma Nwagba, ya ce lamunin masu amfani da kayayyaki bai kamata ya zama gata ga wasu mutane kaɗan ba, sai dai ya kamata ya kasance dama ga duk ƴan Nijeriya masu aiki.
Kamfanin ya kuma bayyana cewa ya taimaka wajen samar da lamunin da ya kai sama da Naira biliyan 53.5 ga mutane sama da 351,000, tun bayan fara aikinsa, inda mata suka kai kusan kashi 59 cikin 100 na waɗanda suka amfana.
Ana sa ran tsarin SPARK zai samu karɓuwa a faɗin Nijeriya kafin ƙarshen shekarar 2026.
