Mataimakin kocin ƙungiyar ƙwallon ƙafa ta Galatasaray, Ismael García, ya bayyana cewa masu tsaron bayan Barcelona ba za su iya dakatar da ɗan wasan gaban Nijeriya, Victor Osimhen, ba a wasan da ƙungiyoyin biyu za su fafata a gasar Zakarun Turai ranar Talata. García ya ce Osimhen yana cikin ƙoshin lafiya kuma a shirye yake ya nuna ƙwarewarsa a wasan.
Osimhen ya dawo taka leda bayan ya shafe wani lokaci yana jinya, inda ake sa ran zai jagoranci harin Galatasaray a karawar da za su yi da Barcelona, zakarun ƙwallon ƙafa na Sifaniya. Da yake magana da jaridar Diario Sport ta Sifaniya, García ya bayyana Osimhen a matsayin ɗan wasa mai ƙarfi da sauri, wanda yake da ƙarfin kutsawa ta katangar tsaron da kocin Barcelona, Hansi Flick, ke amfani da ita.
Dawowar Osimhen bayan murmurewa daga raunin da ya samu ta ƙara wa Galatasaray kwarin gwiwa gabanin wannan muhimmiyar fafatawa. García ya ce Osimhen na daga cikin ’yan wasan da za su iya nuna bajinta a kowane lokaci, musamman idan aka yi la’akari da ƙalubalen da ke gabansu na fuskantar ɗaya daga cikin ƙungiyoyin da suka fi ƙarfi a Turai.
Duk ƙungiyoyin biyu sun samu nasara a wasannin da suka buga a ƙarshen mako, lamarin da ke nuna cewa za su shiga wannan fafatawa cikin kyakkyawan yanayi da kwarin gwiwar samun nasara. Ana sa ran dawowar Osimhen za ta zama muhimmin ƙari ga Galatasaray, yayin da Barcelona za ta yi ƙoƙarin hana shi samun damar cin ƙwallo.
