Ƙaramin Ministan Tsaro kuma tsohon Gwamnan Jihar Zamfara, Bello Matawalle, ya jagoranci sauya sheƙar ƴan majalisar dokokin Jihar Zamfara takwas daga Jam’iyyar PDP mai mulkin jihar zuwa Jam’iyyar APC. Wannan sauya sheƙa ta tabbata ne a ranar Talata, 20 ga watan Oktoba, 2026, a birnin Abuja, inda ministan ya tarɓi ƴan majalisar tare da miƙa musu tutar jam’iyyar.
Ƴan majalisar sun bayyana cewa sun ɗauki matakin barin PDP ne sakamakon rashin gamsuwa da salon mulkin Gwamna Dauda Lawal da kuma taɓarɓarewar tsaro da ke ci gaba da addabar al’ummar Zamfara. Sun jaddada cewa haɗa ƙarfi da Matawalle da shugabancin APC zai ba su kyakkyawar damar fafutukar ceto al’ummominsu da kuma samar da ci gaba mai ma’ana.
Da yake jawabi a wajen taron, Matawalle ya yaba wa ƴan majalisar kan jajircewarsu, yana mai tabbatar musu da cewa APC za ta ba su cikakkiyar dama da kariya a cikin tafiyarta. Wannan mataki ya ƙara ruguza ƙarfin PDP tare da bai wa APC rinjaye a Majalisar Dokokin Jihar Zamfara, lamarin da ke zama babbar koma-baya ga gwamnatin jihar mai ci.
Masana harkokin siyasa sun bayyana cewa wannan sauyin sheƙa na nuni da yadda APC ke ƙara ƙarfafa kanta a Arewa maso Yamma gabanin babban zaɓen 2027.
Ya zuwa yanzu, fadar gwamnatin Jihar Zamfara da shugabancin jam’iyyar PDP ba su mayar da martani ba kan wannan ɓaraka da ta auku a cikin majalisar.
