Tsohon Gwamnan Jihar Kaduna, Nasir El-Rufai, ya sake kira da a yi masa shari’a cikin adalci yayin da ya cika kwanaki 256 a tsare.
El-Rufai ya bayyana hakan ne a cikin wani saƙo da ya wallafa a shafinsa na X ranar Juma’a, inda ya ce yin shari’a cikin adalci haƙƙi ne na ɗan Adam, ba alfarma ko gata ba.
Hukumar Yaƙi da Cin Hanci da Rashawa da Yi wa Tattalin Arziƙi Zagon Ƙasa (EFCC) ce, ta kama shi a ranar 16 ga watan Fabrairu, 2026, bisa zargin almundahana da kuɗaɗen jihar a lokacin da yake gwamna tsakanin 2015 da 2023.
Haka kuma, yana fuskantar wata shari’a daban da Hukumar Tsaro ta Farin Kaya (DSS) ta shigar a kansa bisa zargin sa hannu a yin kutse a wayar Mai Bai wa Shugaban Ƙasa Shawara kan Harkokin Tsaro, Nuhu Ribadu.
El-Rufai ya musanta aikata laifukan da ake tuhumarsa da su.
Duk da cewa wasu kotuna sun ba da belinsa, har yanzu yana tsare saboda tsaurara sharuɗan belin.
