Akalla mutum 11 ne suka rasa rayukansu, yayin da wasu kusan 32 suka jikkata a wani mummunan hatsarin mota da ya auku a kan hanyar Jos zuwa Bauchi a Jihar Bauchi.
Hukumar da ke kula da zirga-zirgar ababen hawa ta (FRSC) reshen jihar Bauchi ta tabbatar da faruwar lamarin a ranar Asabar, inda ta ce mutanen sun ƙone kurmus bayan motocin da suka yi karo sun kama da wuta.
A cewar hukumar, hatsarin ya faru ne a ranar Juma’a a yankin Panshanu Hill da ke kan babbar hanyar Bauchi zuwa Jos.
Motocin da abin ya shafa sun haɗa da wata karamar tankar mai kirar MAN da ke aiki tare da rundunar ‘yan sandan Nijeriya, da kuma wata motar bas kirar FAIT J5 Boxer mai lambar rajista KTU624XY da ake amfani da ita wajen ɗaukar fasinjoji.
Rahotanni sun nuna cewa hatsarin ya faru ne a kan hanya mai layi ɗaya da ba a shimfiɗa ta yadda ya kamata ba, yayin da aka danganta musabbabin hatsarin da tukin ganganci da kuma tsofaffin tayoyi.
Jimillar mutane 43 ne hatsarin ya shafa, ciki har da maza manya 12, mata manya 19, yara maza biyar da yara mata bakwai.
Daga cikin waɗanda suka jikkata akwai yara maza biyar, mata manya 19, yara mata bakwai da kuma namiji guda ɗaya, yayin da waɗanda suka mutu suka haɗa da namiji guda ɗaya, yara maza uku, mata manya biyar da yara mata biyu.
Rahotanni sun ƙara da cewa an kwashe waɗanda suka jikkata zuwa Asibitin Toro domin samun kulawa, yayin da aka ajiye gawarwakin waɗanda suka mutu a ɗakin ajiyar gawa na asibitin.
