Gwamnatin Jihar Kaduna ta sake jaddada kudirinta na inganta jin dadin malamai a fadin jihar, domin kara inganta harkar ilimi da kuma samar da ingantaccen aikin koyarwa.
Kwamishinan Ilimi na jihar, Farfesa Sani Sambo, wanda ya wakilci Gwamnan Kaduna, Sanata Uba Sani, Shi ya bayyana hakan a wajen bikin Ranar Malamai ta Duniya na shekarar 2026 da aka gudanar a jihar.
Bikin na bana ya samu halartar malamai, masu ruwa da tsaki a harkar ilimi, shugabannin kungiyoyin kwadago da wakilan gwamnati domin karrama malamai bisa irin gudunmawar da suke bayarwa wajen ci gaban al’umma.
Farfesa Sani Sambo ya ce gwamnatin jihar za ta ci gaba da tallafa wa bangaren ilimi tare da tabbatar da dorewar ka’idojin Hukumar UNESCO a cikin kasafin kudin jihar na kowace shekara, musamman wajen samar wa malamai abubuwan da za su taimaka musu wajen gudanar da ayyukansu yadda ya kamata.
Ya kuma yi kira ga al’ummar jihar da su ci gaba da tallafa wa kokarin gwamnati na bunkasa harkar ilimi a Kaduna.
A nasa jawabin, Shugaban Kungiyar Malaman Naieriya (NUT) na jihar Kaduna, Kwamared Ibrahim Dalhatu, ya tabbatar wa malamai cewa kungiyar za ta ci gaba da kare hakkokinsu da kuma inganta jin dadinsu.
Ya bukaci malamai da su kasance masu jajircewa wajen gudanar da ayyukansu, tare da cika nauyin da ke kansu domin ci gaban harkar ilimi da jihar baki daya.
A sakonninsu daban-daban, Shugaban Kungiyar Kwadago ta Nijeriya (NLC) reshen jihar, Kwamared Ayuba Magaji Sulaiman, da Kwamared Alkalis Haruna, sun taya malamai murnar wannan rana, tare da yabawa irin gudunmawar da suke bayarwa wajen ci gaban jihar da kasa baki daya.
