Majalisar Ƙoli ta Malamai ta Ƙasa ta yi kira da a yi adalci wajen gudanar da shari’o’in da suka shafi tsohon Gwamnan Jihar Kaduna, Malam Nasir El-Rufai da Sheikh Sani Abdulkadir Zaria da sauran waɗanda ake tuhuma, tana mai jaddada muhimmancin bin doka da kare haƙƙin kowane ɗan Nijeriya.
Majalisar ta bayyana hakan ne a cikin sanarwar da ta fitar bayan taronta na shekara-shekara da aka gudanar a hedikwatar Jama’atu Nasril Islam (JNI), da ke Kawo, Kaduna Wanda Sheikh Ahmed Maqari ya sanyawa hannu.
Ta bayyana cewa ya kamata hukumomin shari’a su tabbatar da adalci ba tare da nuna son kai ba, tare da bai wa duk wanda ake tuhuma damar kare kansa bisa tanadin doka.
Majalisar ta kuma jaddada cewa bai kamata a hukunta mutum ba kafin a kammala shari’arsa bisa ƙa’ida, tana mai kira ga dukkan ɓangarorin da abin ya shafa da su mutunta tsarin shari’a da kauce wa duk wani abu da zai iya kawo cikas ga gudanar da adalci.
A cikin sanarwar, Majalisar ta kuma yi kira ga gwamnati da ta ƙara ƙaimi wajen magance matsalolin tsaro, tsadar rayuwa da sauran ƙalubalen da ke addabar al’umma.
Haka kuma, ta yi gargaɗi ga ’yan siyasa da magoya bayansu da su guji kalaman da za su iya tayar da rikici, musamman yayin da ƙasar ke tunkarar babban zaɓen 2027.
Majalisar ta buƙaci gwamnati da al’umma su ba da fifiko ga zaman lafiya, adalci, mutunta juna da bin doka, tare da tabbatar da cewa an kare haƙƙin kowane ɗan Nijeriya ba tare da la’akari da matsayinsa ba.
