Gwamnan Jihar Kaduna, Sanata Uba Sani, ya sanya hannu kan dokar kafa Kwalejin Koyar da Ƙwararrun Ma’aikatan Jinya a Matakin Farko a Rigasa, domin ƙara samar da ƙwararrun ma’aikatan lafiya a jihar.
Kwamishinan Yaɗa Labarai da Al’adu na jihar, Malam Ahmed Maiyaki, ne ya bayyana hakan a cikin wata sanarwa da ya fitar..
Ya ce kafa kwalejin na daga cikin matakan da gwamnatin jihar ke ɗauka domin magance ƙarancin ƙwararrun ma’aikatan jinya, tare da inganta ayyukan kiwon lafiya a faɗin jihar.
A cewarsa, makarantar za ta taimaka wajen horas da ma’aikatan jinya a fannoni na musamman, musamman waɗanda suka shafi kula da mata masu juna biyu, jarirai da yara, bayar da agajin gaggawa da kuma kula da marasa lafiya da ke cikin mawuyacin hali.
Sanarwar ta bayyana cewa, ƙarƙashin dokar kafa kwalejin ta shekarar 2026, makarantar za ta kasance cibiyar horas da ƙwararrun ma’aikatan jinya a matakin manyan makarantu, inda babban harabarta zai kasance a Rigasa.
Dokar ta kuma tanadi yiwuwar buɗe wasu harabobi, makarantu da cibiyoyin horaswa a wasu wurare, matuƙar hukumomin da abin ya shafa sun amince da hakan.
Kwamishinan ya bayyana cewa kwalejin za ta koyar da fannoni daban-daban da suka haɗa da ungozoma, kula da lafiyar kwakwalwa, aikin jinya a lokacin tiyata, kula da lafiyar yara, bayar da agajin gaggawa, kula da marasa lafiya a sashen kulawa ta musamman, kiwon lafiyar jama’a, da kuma koyarwa da gudanar da harkokin jinya.
Ya ƙara da cewa kafa makarantar zai taimaka wajen haɓaka ƙwarewar ma’aikatan lafiya, ƙarfafa bincike da nazari, da kuma samar da damarmakin ci gaba da horaswa ga ma’aikatan jinya.
Haka kuma, kwalejin za ta yi aiki tare da asibitocin koyarwa, jami’o’i, cibiyoyin kula da marasa lafiya na musamman da sauran cibiyoyin horaswa da aka amince da su.
A cewar sanarwar, dokar ta tanadi kafa Majalisar Gudanarwa da za ta kula da tsare-tsaren makarantar, da kuma Hukumar Ilimi wadda za ta kasance mai kula da ingancin karatu, bincike da horas da ɗalibai.
Dukkan shirye-shiryen karatun kwalejin za su kasance ƙarƙashin ƙa’idoji da tsarin tantance ingancin karatu na Hukumar Kula da Ma’aikatan Jinya da Ungozoma ta Nijeriya (NMCN), da sauran hukumomin da doka ta ba su ikon gudanar da irin wannan aiki.
Maiyaki ya ce kafa kwalejin ya yi daidai da manyan tsare-tsaren gwamnatin Gwamna Uba Sani na sake fasalin ɓangaren kiwon lafiya, waɗanda suka haɗa da inganta cibiyoyin kiwon lafiya na matakin farko guda 255 da gyaran manyan asibitoci 16 a faɗin jihar.
Ya jaddada cewa, samar da gine-ginen kiwon lafiya kaɗai bai isa ba, sai an samar da ƙwararrun ma’aikata waɗanda za su iya gudanar da ayyukan lafiya yadda ya kamata, musamman a yankunan da ba su da isassun ma’aikatan lafiya.
Kwamishinan ya ƙara da cewa kwalejin za ta taimaka wajen samar da ɗorewar tsarin horas da ƙwararrun ma’aikatan jinya, ƙarfafa cibiyoyin kiwon lafiya da inganta kulawa da marasa lafiya a jihar.
Ya tabbatar da cewa gwamnatin jihar za ta yi ƙoƙarin bunƙasa makarantar domin ta zama cibiyar ƙwarewa wajen koyarwa, bincike da horas da ma’aikatan jinya, tare da taimakawa wajen tabbatar da samun ingantaccen kiwon lafiya ga al’ummar Jihar Kaduna.
