Hukumar yaƙi da safarar mutane ta ƙasa (NAPTIP) da ƙungiyar International IDEA sun buƙaci ‘yan jarida su ƙara zurfafa bincike da wayar da kan al’umma domin yaƙi da cin zarafin mata da sauran nau’o’in cin zarafi ta fuskar jinsi (SGBV) a Nijeriya.
Sun yi wannan kiran ne yayin wani taron karawa Juna ilimi ga ‘yan jarida masu yaƙi da cin zarafin mata da jinsi (SGBV Media Corps) a jihar Kaduna.
Taron ya haɗa wakilan hukumar NAPTIP da International IDEA da ƙwararrun ‘yan jarida domin tattauna hanyoyin dakile cin zarafi tare da kare masu rauni a cikin al’umma domin tabbatar da ɗaukar matakin da ya dace kan masu aikata laifukan.
Da yake magana a madadin Darakta-Janar na NAPTIP, shugaban sashen yaɗa labarai da hulɗa da jama’a na hukumar, Vincent Adekoye, ya buƙaci ‘yan jarida su ƙara himma wajen wayar da kan jama’a tare da sanya ido kan masu aikata laifukan cin zarafi.
Adekoye ya ce masu aikata irin waɗannan laifuka na ci gaba da ƙirƙirar sabbin hanyoyi wajen gudanar da ayyukansu, lamarin da ya sa ake buƙatar ‘yan jarida su kasance masu lura da kuma zurfafa bincike kan duk wani lamari da ya shafi cin zarafi.
Ya jaddada muhimmiyar rawar da kafafen yaɗa labarai za su iya takawa wajen kare yara, matasan da ke rayuwa a kan tituna da mata daga cin zarafi da amfani da su ta haramtacciyar hanya.
Jami’in ya kuma bukaci ‘yan jarida su fahimci dokokin da suka shafi cin zarafin mata da sauran laifukan da suka shafi jinsi, tare da amfani da kafafen yaɗa labaransu wajen fallasa laifuka, wayar da kan jama’a da kuma ci gaba da jan hankalin al’umma kan matsalar.
Ya ƙara da cewa akwai buƙatar ‘yan jarida da sauran masu ruwa da tsaki su riƙa bibiyar manufofin gwamnati, tantance matakan da hukumomi ke ɗauka da kuma tabbatar da cewa an ɗora wa waɗanda abin ya shafa alhakin gudanar da ayyukansu yadda ya kamata.
A cewarsa, shirin na tsawon shekaru huɗu an tsara shi ne domin taimakawa wajen kawar da cin zarafin mata da sauran nau’o’in cin zarafi ta fuskar jinsi a Najeriya, ta hanyar ci gaba da wayar da kan jama’a da haɗin gwiwar masu ruwa da tsaki.
Ya bayyana cewa ingantaccen aikin jarida zai taimaka wajen ƙara fahimtar al’umma kan matsalar, ƙarfafa gwiwar waɗanda aka zalunta su kai rahoton abin da ya faru da su, tare da inganta ɗaukar mataki kan masu aikata laifukan.
A nata jawabin, mai Kula da jagoranci ‘yan jarida masu yaƙi da cin zarafin mata da jinsi a jihar Kaduna, Dakta Lauratu Abdulsalam, ta jaddada muhimmancin haɗin gwiwa tsakanin ‘yan jarida da sauran masu ruwa da tsaki domin inganta yadda ake bayar da rahotannin irin waɗannan laifuka.
Ta ce ƙarfafa haɗin gwiwa tsakanin kafafen yaɗa labarai da hukumomin da abin ya shafa zai taimaka wajen wayar da kan jama’a, inganta bayar da rahotanni cikin kwarewa da kuma ƙarfafa ƙoƙarin dakile cin zarafi.
Ta ƙara da cewa ya kamata ‘yan jarida su ci gaba da gudanar da aikinsu cikin kwarewa da sanin ya kamata, musamman wajen kare mutuncin waɗanda aka zalunta da kuma tabbatar da cewa rahotanninsu suna taimakawa wajen samar da mafita.
