Dan wasan tsakiyar Barcelona Rodri ya nemi afuwar kungiyar kwallon kafa ta Valencia bayan kalaman da yayi akan kungiyar a lokacinda Barcelona ta doke su da ci 5-0 a wasan Mako na 4 na gasar Laliga ta bana a ranar Lahadi.
An ruwaito cewa, Rodri ya yi sharhi akan Valencia bayan kammala wasan, inda ya kirasu da “kungiya mai rauni sosai”.
A cewar BBC, ana zargin Rodri ya fadi kalaman ne a lokacin da suke zaune da abokan wasanshi na Barcelona Pau Cubarsí da Raphinha yayin da suke zaune a benci bayan an maye gurbinsu a lokacin wasan da aka buga a filin wasa na Mestalla dake Valencia, duk da cewar faifan bidiyon da aka nada ba shi da sauti, amma wata kafar watsa labarai ta kasar Spain (Movistar) ta fassara abinda tsohon dan wasan na Manchester City ya fadi ta hanyar karanta lebensa.
Movistar ta ruwaito Rodri na cewa “Suna da rauni sosai, sun kasa tsallaka rabin filin wasan”.
Wadannan kalaman sun haifar da suka daga magoya bayan Valencia da sassan kafofin watsa labarai na kasar Spain, inda ake zargin Rodri da rashin girmama kungiyar da ke fama da rashin katabus a wannan kakar ta bana, duk da haka, Rodri ya ce ya nemi afuwa ta hanyar kiran kyaftin din Valencia kuma abokin wasansa na tawagar kasar Spain Jose Gaya da kuma dukkan yan wasan kungiyar.
Valencia ita ce kasan teburin La Liga bayan ta kasa samun nasara a wasanni hudu na farko da ta buga a wannan kakar wasan yayin da Barcelona ke matsayi na daya bayan samun nasara a dukkan wasanninta hudu na wannan kakar wasan ta bana.
Rodri ya koma Barcelona a wannan bazarar a kan fam miliyan 65 daga Manchester City bayan ya taimaka wa Spain lashe Kofin Duniya na shekarar 2026, inda ya lashe kyautar gwarzon dan wasan kofin na Duniya.
