Kocin Man U, Erik ten Hag ya ce tauraron Manchester United, Cristiano Ronaldo, ba na siyarwa bane kuma ya na daya daga cikin ‘yan wasan da zasu ci gaba da buga wasa a kungiyar.
Dan wasan mai shekaru 37 ya koma filin wasa na Old Trafford ne a shekarar da ta gabata a wata siyayya mai ban mamaki daga Juventus.
Ronaldo har yanzu yana da sauran kaka daya a yarjejeniyarsa da Manchester United.
Duk da ana ta rade-raden cewa, dan Wasan zai bar kungiyar a bana sabida rashin halartarsa zuwa buga wasannin kawance da Kungiyarsa ke bugawa a Thailand da Australia, hakan ta faru ne saboda matsalar iyali.
“Bai gaya min ba (yana son tafiya). Na karanta a wasu kafafen yada labarai amma abin da na ce shine, Cristiano ba na siyarwa bane. Cristiano yana cikin shirye-shiryenmu kuma muna son samun nasara tare da shi.” Inji Erik Ten Hag
