A yau Laraba 31 ga Disamba, 2025, shugaban kasar Sin Xi Jinping da shugaban kasar Rasha Vladimir Putin sun yi musayar gaisuwar sabuwar shekara.
Shugaban kasar Sin, a madadin gwamnati da al’ummar kasarsa, ya bayyana kyakkyawan fata ga shugaban kasar Rasha da al’ummar kasar. Xi Jinping ya nuna cewa, shekarar 2025 ita ce shekarar cika shekaru 80 da kafa MDD. Sin da Rasha sun shirya bikin cika shekaru 80 da samun nasarar yakin da Sinawa suka yi da mamayar dakarun Japan, da yakin kare tarayyar Soviet da kuma nasarar yakin duniya na adawa da tafarkin murdiyya, wanda ya bayyana niyyar duniya ta samun zaman lafiya da adalci.
Xi Jinping ya kuma nuna cewa, shekarar 2026 ita ce shekarar cika shekaru 30 da kafa dangantakar abokan hadin gwiwa bisa manyan tsare-tsare a dukkannin fannoni tsakanin Sin da Rasha da kuma shekarar cika shekaru 25 da rattaba hannu kan yarjejeniyar abota da hadin gwiwa tsakanin Sin da Rasha. Yana mai fatan ci gaba da tuntubar shugaba Putin, don hadin gwiwar shugabannin biyu wajen jagorantar dangantakar Sin da Rasha a sabon zamani da za ta ci gaba da samar da sabbin sakamako.
A nasa bangare, shugaban kasar Rasha Putin ya mika cikakkiyar taya murnar sabuwar shekara ga Xi Jinping. Ya yi fatan samun farin ciki da koshin lafiya ga al’ummar Sinawa. Putin ya bayyana cewa, dangantakar abokan hadin gwiwa bisa manyan tsare-tsare a dukkan fannoni a sabon zamani tsakanin Rasha da Sin ta ci gaba da samun sakamako masu yawa a shekarar da muke bankwana da ita. A shekara mai zuwa, kasashen biyu za su bude “shekarar ba da ilimi tsakanin Rasha da Sin” tare. Yana kuma fatan kara tuntubar Xi Jinping game da dangantakar kasashen biyu da manyan batutuwan kasa da kasa.
Duk dai a wannan rana, firaministan kasar Sin Li Qiang da takwaransa na kasar Rasha Mikhail Mishustin sun yi musayar gaisuwar sabuwar shekara. (Amina Xu)
