Kakakin ma’aikatar cinikayya ta kasar Sin He Yadong, ya amsa tambayoyin da aka yi masa dangane da batun ragewa, ko soke daukacin harajin fito kan albarkatun gona daga kasar Amurka, yayin taron manema labarai na yau Alhamis, yana mai cewa cinikayyar albarkatun gona muhimmin bangare ne na hadin gwiwar tattalin arziki da cinikayya tsakanin Sin da Amurka.
He Yadong, ya ce bayan tattaunawa game da tattalin arziki da cinikayya, sassan biyu sun samar da kudurorin da za su sanya gaba, wajen cimma nasarar fadada cin gajiyarsu a bangaren cinikayyar albarkatun gona, sun kuma amince da shigar da nau’o’in albarkatun gona masu nasaba cikin tsarin rage harajin fito ga junansu.
Kasar Sin a shirye take ta yi aiki tare da Amurka wajen samar da managarcin yanayi na bunkasa hada-hadar cinikayyar albarkatun gona tsakaninsu.
Bugu da kari, He Yadong ya ce yayin gabatar da taron farko na tsarin tuntuba game da hada-hadar cinikayya da zuba jari tsakanin Sin da kungiyar EU, sassan biyu sun cimma matsaya kan sabon matakin yaukaka alakar tattalin arziki da cinikayya tsakanin Sin da EU, wato matsaya mai daidaito, da karko ta hadin kai a fannin cinikayya tsakanin Sin da Turai.
Har ila yau, bangaren Sin na gayyatar jami’ai daga bangaren hukumar gudanarwar kungiyar tarayyar Turai da su ziyarci Sin gabanin shiga yanayin hunturu mai zuwa, don gudanar da taro na biyu karkashin tsarin tuntubar da suka kafa. (Saminu Alhassan)
