Gashi na daga cikin abubuwan da ke kara wa mace kyau da armashi. Kyakkyawan gashi ba wai yana kawata kamanni kadai ba ne, yana kuma nuna cewa mutum yana kula da tsaftar jikinsa. Sai dai, domin gashi ya kasance cikin koshin lafiya, yana bukatar kulawa ta musamman.
Masana sun bayyana cewa kula da gashi yadda ya kamata na taimakawa wajen kare fatar kai daga wasu matsaloli kamar kaikayi, dandruff (kurajen fatar kai) da karyewar gashi.
Wanke gashi akai-akai:
Wanke gashi da shamfu mai laushi yana taimakawa wajen cire kura, mai da gumi da ke taruwa a fatar kai. Sai dai ba lallai ba ne a rika wanke gashi kullum, domin hakan kan cire man da fatar kai ke samarwa wanda ke taimakawa gashin ya kasance cikin koshin lafiya. A yawan wankewa ya danganta da nau’in gashi da yanayin fatar kai.
Kiyaye tsaftar fatar kai:
Fatar kai tana bukatar kulawa kamar yadda ake kula da fuska. Rashin tsafta na iya janyo kaikayi ko wasu matsalolin fatar kai. Don haka, yana da kyau a rika tsaftace gashi da kayan da suka dace da shi.
Cin sbinci mai gina jiki:
Abincin da mutum yake ci yana da tasiri ga lafiyar gashi. Cin abinci mai dauke da furotin, bitamin da ma’adanai, tare da shan isasshen ruwa, na taimakawa gashi ya kasance mai karfi da lafiya.
Guje wa abubuwan da ke lalata gashi:
Yawan amfani da zafi mai ƙarfi wajen gyaran gashi, amfani da wasu sinadarai ba tare da sanin amincinsu ba, ko kuma daure gashi da karfi sosai na iya janyo karyewa da raunana gashi. Saboda haka, yana da kyau a rika amfani da hanyoyin da suka dace wajen kula da shi.
Kare gashi daga bushewa,:
Bushewar gashi kan sa ya rika karyewa cikin sauki. Yin amfani da man gashi ko sauran kayayyakin kula da gashi da suka dace da nau’in gashin mutum na iya taimakawa wajen kiyaye danshinsa.
Kula da gashi ba wai don kawata kamanni kadai ake yi ba, har ila yau hanya ce ta kiyaye lafiyar fatar kai da gashin baki daya.
