Kamfanin kere-keren fasahar motoci da gudanar da bincike na kasar Sin, watau CATARC ya fara aikin gina wata cibiyar gwaji ta dusar kankara domin motocin sabon makamashi da aka sa wa fasahar zamani, watau ICNEVs, irinta ta farko mafi girma a duk duniya, a jihar Mongoliya ta cikin gida mai cin gashin kanta da ke arewacin kasar Sin.
Cibiyar wacce aka tsara budewa a shekarar 2028, za ta kasance irinta ta farko a duniya da za ta iya samar da dusar kankara a cikin killataccen wuri mai rufi, domin gudanar da gwaje-gwaje a yanayin zubar dusar kankara da aka kirkiro, kamar yadda jaridar kimiyya da fasaha ta kasar Sin ta ruwaito a jiya Lahadi.
Motocin ICNEVs su ne motocin da aka sada da fasahohin sabon makamashi da ingantaccen tsarin sadarwa, da tuki mai sarrafa kansa, da kuma tsare-tsaren fasahar zamani, wanda ke mayar da motoci na tsohon yayi su zamo tamkar matattarar fasaha da ke kai-komo. (Mai fassara: Abdulrazaq Yahuza Jere)
