Shugaban Hukumar Zaɓe Mai Zaman Kanta ta Ƙasa (INEC), Farfesa Joash Amupitan, ya bayyana cewa za a tura sama da Mambobi Masu Hidimtawa Ƙasa (NYSC) miliyan 1.4 domin gudanar da babban zaɓen shekarar 2027 a faɗin ƙasar nan.
Amupitan ya bayyana hakan ne a ranar Litinin yayin wata ziyarar girmamawa da ya kai wa Darakta Janar na NYSC, Birgediya Janar Olakunle O. Nafiu, a Yakubu Gowon House, hedkwatar shirin da ke Abuja.
A cikin wata sanarwa da Adedayo Oketola, mai ba shugaban INEC shawara kan yaɗa labarai da hulɗa da jama’a, ya sanya wa hannu, an bayyana cewa ganawar da shugabannin NYSC ta wuce ziyara ta yau da kullum, face wata dama ce ta nuna godiya ga muhimmiyar rawar da masu yi wa ƙasa hidima ke takawa a tsarin zaɓen Nijeriya.
A cewarsa, NYSC na daga cikin manyan ginshiƙan da ke tallafa wa dimokuraɗiyyar Nijeriya, yana mai cewa mambobin shirin sun ci gaba da taka muhimmiyar rawa wajen gudanar da zaɓe tun daga shekarar 1999.
