Hukumar kula da lafiya ta kasar Sin ta bayyana a yau cewa, kasar ta gabatar da sabon jerin magungunan dake cikin inshorar lafiya ta kasar, da kuma jerin magungunan masu tsada na farko dake cikin inshora.
Cikin sabon jerin, an sanya karin magunguna 114, kuma daga cikinsu, 50 sababbin magunguna ne da aka kirkiro, wadanda ba a taba amfani da su ba. Hakan ya sa jerin ya kunshi wasu magungunan da suka cike gibin inshorar lafiya ta yau da kullum, kamar magungunan manyan cututtuka da wadanda ba kasafai ake ganinsu ba da na rashin lafiya mai tsanani.
Haka kuma, jerin magunguna masu tsada dake cikin inshorar ya hada da magunguna 19 da suka shafi cututtukan daji da cututtukan da ba kasafai ake ganinsu ba da cutar mantuwa ta Alzheimer’s.
Shekaru 8 a jere ke nan hukumar kula da inshorar lafiya ta kasar Sin tana sabunta jerin magungunan, inda jimilar su ta kai 3,253, kuma suka shafi karin bangarori kamar na cututtukan daji da cututtuka masu tsanani da na kwakwalwa da wadanda ba kasafai a kan gani ba da kuma magungunan yara. (Mai fassara: FMM)
