Sojojin Operation FANSAN YAMMA, tare da haɗin gwiwar ’yan sa-kai, sun cafke wasu manyan kwamandojin ƙungiyar ’yan ta’adda da ake zargi da hannu wajen sacewa da kashe Manjo Janar Abubakar Rabe mai ritaya a Jihar Katsina. An gudanar da sumamen ne ranar Lahadi, 20 ga Satumba, 2026.
Wata majiya daga rundunar soji da ke Gusau ta shaida wa jaridar Leadership cewa an kama wasu manyan mambobin ƙungiyar da ke ƙarƙashin jagorancin wani da ake kira Kachalla Maha. Daga cikin waɗanda aka cafke akwai wani babban kwamanda mai suna Samagi, wanda ake zargi da taka muhimmiyar rawa a tsarin jagoranci da ayyukan ƙungiyar.
Majiyar ta bayyana cewa waɗanda aka kama ana zarginsu da hannu wajen satar mutane, kashe-kashe da sauran hare-haren ta’addanci da ake dangantawa da ƙungiyar a wasu sassan Arewa maso Yamma. Wani jagoran ’yan sa-kai mai suna Mamara ya ce cafke Samagi da sauran kwamandojin na iya taimaka wa jami’an tsaro wajen samun bayanai kan maɓoyarsu, da hanyoyin samar musu da kayayyaki da kuma waɗanda ke taimaka musu.
Ana sa ran za a gudanar da ƙarin bincike kan waɗanda aka kama domin tantance rawar da kowannensu ya taka a ayyukan ƙungiyar da kuma yiwuwar hannunsu a wasu hare-hare. Sai dai, ya zuwa lokacin haɗa rahoton, rundunar sojojin ba ta bayyana adadin waɗanda aka kama ko makaman da aka ƙwato ba.
