Mai magana da yawun ma’aikatar kasuwanci ta Sin He Yongqian, ta ce takunkumin Amurka kan fitar da kayan latironi na “semiconductor” bisa hujjar tsaron kasa, ya illata hakkoki da muradun kamfanonin kasar Sin, kana ya kawo cikas ga tsarin tattalin arziki da cinikayyar kasa da kasa, baya ga mummunan tasiri da ya yi ga kwanciyar hankali a tsarin samar da semiconductor na duniya, lamarin da Sin ke ci gaba da adawa da shi.
Jami’ar ta kara da cewa, Sin na kira ga Amurka da ta gaggauta gyara matakan kuskure, ta dakatar da matakan nuna wariya ga kasar Sin, da kuma kare daidaito a tsarin samar da kayayyaki na duniya.
He, ta bayyana hakan ne a yau Alhamis, a yayin taron manema labarai na yau da kullum, lokacin da take martani kan wata tambaya da aka yi mata, dangane da matakin ma’aikatar kasuwancin Amurka, na warware abun da ta kira “matsalolin sa ido” a masana’antar semiconductor.
Bugu da kari, game da shawarar Amurka, ta kara haraji kan kasashen da ake zargi da tilastawa jama’a yin kwadago, He ta bayyana cewa, kasar Sin tana adawa da duk wani nau’i na kakaba takunkumi daga bangare daya, ciki har da jerin takunkuman ciniki da aka sanya wa Sin, bisa fakewa da hujjar wai ana “tilastawa jama’a yin kwadago”.
Sin ta yi kira ga Amurka da ta yi aiki tare da Sin, don tabbatar da daidaiton dangantakar tattalin arziki da cinikayya tsakanin kasashen biyu. (Safiyah Ma)
