Tawagogin kasar Sin da na Amurka sun gudanar da tattaunawa mai zurfi da ma’ana, sun kuma yi musayar ra’ayoyi da shawarwari dangane da batutuwan tattalin arziki da cinikayya da kasashen biyu suke mayar da hankali a kansu, ciki har da tsare-tsaren harajin fito, da ingiza dangantakar cinikayya da zuba jari, tare da wanzar da sakamako na matakai da suka amincewa bayan tattaunawa.
Jagororin tattaunawar ta wannan karo da ta gudana a ranakun Lahadi da jiya Litinin, sun hada da jagoran tawagar Sin, kuma mataimakin firaministan kasar He Lifeng. Sai kuma bangaren Amurka da ya hada da sakataren baitul-malin kasar Scott Bessent, da wakilin cinikayyar Amurka Jamieson Greer.
Da yake tsokaci yayin sabon zagayen tattaunawar, He Lifeng ya ce, karkashin kyakkyawan tsari na muhimmiyar fahimtar juna tsakanin shugabannin kasashen biyu, da sakamakon zagaye biyar na tattaunawar tattalin arziki da cinikayya da suka gudanar cikin shekarar da ta gabata, Sin da Amurka sun cimma jerin nasarori a fannonin raya tattalin arziki da na cinikayya.
He ya ce, wadannan sakamako sun ingiza babban yanayi na tabbas, da daidaito cikin dangantakar tattalin arziki da cinikayya tsakanin sassan biyu, da ma tattalin arzikin duniya baki daya. Mataimakin firaministan na Sin ya kara da cewa, har kullum kasar Sin na adawa da matakin kakaba haraji daga bangare guda da Amurka ke aiwatarwa. Yana mai kira gare ta da ta kawar da dukkanin irin wadannan haraji, da ma sauran matakai masu haifar da tarnaki. A cewarsa, Sin za ta aiwatar da matakai na wajibi domin kare halastattun hakkoki da moriyarta.
Kazalika, Sin na fatan Amurka za ta rungumi tafarki na bai daya tare da Sin, ta kuma yi biyayya ga kudurorin musamman da shugabannin kasashen biyu suka cimma, tare da fadada fannonin hadin gwiwa, da takaita matsalolin da suke fuskanta, ta yadda hakan zai ingiza bunkasar alakar tattalin arziki, da cinikayya mai inganci da daidaito tsakanin kasashen biyu.
Wakilai daga bangaren Amurka kuwa, sun ce daidaito a yanayin alakar tattalin arziki, da cinikayya tsakanin Sin da Amurka, na da matukar muhimmanci ga kasashen biyu da ma duniya baki daya, zai kuma tallafa matuka wajen bunkasa tattalin arzikin duniya, da samar da kariya ga tsarin rarraba hajoji zuwa sassan kasa da kasa, da daidaito ga hada-hadar kudade. Bangaren na Amurka, ya kuma bayyana bukatar magance takun-saka, da dakile kara ta’azzarar halin da ake ciki, da warware bambance-bambance ta hanyar gudanar da shawarwari.
Bugu da kari, sassan biyu sun amince da su nazarci kafuwar tsarin gudanar da hadin gwiwa, don ingiza alakar cinikayya da zuba jari, da ci gaba da amfani da tsarin na tattaunawa, da karfafa shawarwari, da tuntubar juna, da kyautata salon warware sabani, da fadada hadin gwiwa na zahiri, da ingiza alakar tattalin arziki da cinikayya mai dorewa, inganci da nagarta.
A ranakun Lahadi da jiya Litinin, bangarorin Sin da Amurka sun gudanar da tattaunawar kasuwanci a birnin Paris na Faransa. Yayin zantawar, wakilin musamman na kasar Sin kan harkokin cinikayya, kana mataimakin ministan kasuwancin kasar Li Chenggang ya bayyana cewa, a kwana daya da rabi, tawagogin bangarorin biyu sun gudanar da tattaunawa ta gaskiya kuma mai zurfi. Kana an cimma matsaya daya a matakin farko kan wasu batutuwa, kuma a mataki na gaba bangarorin biyu za su ci gaba da tafiyar da tsarin tattaunawar.
Li Chenggang ya ce, a wannan tattaunawa, bangarorin Sin da Amurka sun kara gane cewa, dangantakar ciniki cikin kwanciyar hankalin tsakanin kasashen biyu, tana amfanar da bangarorin biyu, har ma da duniya baki daya.
Discussion about this post