Tsohon Shugaban Majalisar Wakilai, kuma tsohon Gwamnan jihar Katsina, Aminu Masari, ya ce a kusan shekaru 40 da ya shafe yana harkokin siyasa, bai taɓa ganin wani shugaban Nijeriya da ke da kyakkyawan shiri ga ƙasar kamar Shugaba Bola Tinubu ba.
Masari ya bayyana hakan ne a wani bidiyo da aka wallafa ranar Talata, yayin da yake magana da wasu mata a wani taro da aka gudanar a Kaduna.
Ya kare gwamnatin Tinubu daga masu sukar ta da cewa ba ta cimma wani abu ba, yana mai cewa gwamnatocin da suka gabata, ciki har da na Olusegun Obasanjo da Goodluck Jonathan, su ma sun fuskanci irin wannan suka.
Masari ya kuma yi kira ga ’yan Nijeriya da su guji amfani da bambancin ƙabila da addini wajen siyasa.
Ya buƙaci mata masu malamai da su yi amfani da tasirinsu wajen hana kalaman da za su iya raba kan al’umma gabanin zaɓen 2027.
Masari ya yi Shugaban Majalisar Wakilai daga 2003 zuwa 2007, sannan ya zama Gwamnan Jihar Katsina daga 2015 zuwa 2023.
A watan Agustan 2026 kuma, an naɗa shi cikin kwamitin yaƙin neman zaɓen APC Shugaba Tinubu a 2027.
