Wata ƙungiya mai suna Tinubu Must Go (TMG) ta buƙaci wasu manyan ’yan adawa huɗu su haɗa kai tare da mara wa ɗan takara guda ɗaya baya a zaɓen shugaban ƙasa na 2027.
Ƙungiyar ta rubuta wa Atiku Abubakar, Peter Obi, Omoyele Sowore da Seyi Makinde wasiƙa, inda ta buƙace su da su ajiye bambance-bambancen da ke tsakaninsu, su tattauna yadda za su kafa tafiyar haɗaka mai ƙarfi.
TMG ta ce matsalolin rashin tsaro, hauhawar farashin kayayyaki, talauci da rashin aikin yi ne suka sa ta yi wannan kira.
Ta kuma ce za ta gudanar da wani taron tuntuɓa da magoya bayanta a ranar 24 ga watan Satumba.
Ƙungiyar ta bayyana cewa taron zai kasance na biyu idan shugabannin adawar suka cimma wata yarjejeniya da kansu cikin yardar juna.
TMG ta ce za ta kuma tuntuɓi wasu ’yan adawa yayin da take ƙoƙarin ganin an samu ɗan takara guda ɗaya daga tsagin masu hamayya a zaɓen 2027.
