Mataimakin wakilin dindindin na kasar Sin a MDD Sun Lei, ya ce a fannin tunkarar jagorancin duniya, dangane da fasahar kirkirarriyar basira ko AI, kamata ya yi sassan kasa da kasa su yi aiki kafada da kafada, tare da ingiza cimma babbar gajiya daga fasahar.Sun Lei, ya yi kiran ne a jiya Talata, lokacin da yake tsokaci a taron masu ruwa da tsaki dangane da batun AI na shekarar 2026, a gefen dandalin STI na raya kimiyya da fasaha, da kirkire-kirkire karkashin ajandar wanzar da muradun karni ta MDD.
Jami’in ya ce a matsayin AI na fasaha dake ingiza sabon zagayen sauya fasalin fasahohin zamani, da ci gaban masana’antu, a yanzu haka ana kara hade shi da sassan raya tattalin arziki na hakika.
Ya ce bisa karfin ikon fasahar AI, ya kamata duniya ta zurfafa hadin gwiwar sassanta, tare da ingiza bude kofa a fannin kirkire-kirkiren AI. Kazalika, ya yi kira da a karfafa tuntuba, da tsare-tsare, da musayar kwarewa wajen samar da sakamakon kirkire-kirkire da gaggauta amfani da AI a sassan bukatu.
Sun Lei, ya kuma ce Sin a shirye take ta yi aiki tare da dukkanin sassa wajen raba ribar fasahohin dijital da AI, tare da samar da gudummawa ga hadin gwiwar kasa da kasa a fannin gina sanin makamar aiki na AI, da tallafawa ci gaba da amfani da AI a tsarin ayyukan MDD. (Saminu Alhassan)
