Zhejiang Lab, ko kuma dakin gwaje-gwaje na Zhejiang, wata cibiya ce ta nazarin kirkire-kirkiren kimiyya da fasaha wadda aka kafa tun watan Satumbar shekara ta 2017 a Hangzhou, fadar mulkin lardin Zhejiang na gabashin kasar Sin, da nufin aiwatar da manufar raya kasa bisa turbar inganta karfin kimiyya da fasaha da kuma yin kirkire-kirkire.
A ’yan shekarun nan, dakin gwaje-gwaje na Zhejiang yana himmatuwa wajen raya kimiyya da fasahar da ta shafi “AI+”, da fadada hadin gwiwa a wannan bangaren, kuma daya daga cikin samfuran fasahar zamani da ya jagoranci aikin kirkiro shi, wato GeoGPT, ya riga ya hidimta wa masu nazarin kimiyyar duniya wato Geoscience a turance sama da dubu 56 daga kasashe da yankuna 145, ciki har da na Afirka.
Kwararren da ya lashe lambar yabo ta cibiyar injiniyanci ta kasar Sin (CAE), wadda ita ce kololuwar lambar girmamawa da ake gabatarwa ga fitaccen masanin ilimin injiniya da fasahohin kimiyya na kasar, wanda kuma shi ne shugaban dakin gwaje-gwaje na Zhejiang, Dokta Wang Jian, ya yi fatan ganin karin mutanen Afirka za su samu damar amfani da fasahar AI tare kuma da cin gajiyarta, tare da fatan kasashen Afirka za su iya hada AI tare da dimbin albarkatun da suke da su, don kowa ya mori nasarorin ci gaban kimiyya da fasaha. (Murtala Zhang)
