Kwanan nan wasu matasa sama da 20 daga jihar Washington ta kasar Amurka, sun ziyarci lardin Sichuan na kasar Sin, inda suka yi mu’amala da matasan kasar Sin, da ganewa idanunsu dabbar Panda, da kara fahimtar nagartattun al’adun gargajiya da yanayin rayuwa na yankin, a wani kokari na kara fahimtar ainihin halin da ake ciki a kasar Sin daga fannoni daban-daban.
Daya daga cikin matasa Amurkawa mai suna Eva Angelique Bech, ta bayyana cewa: “Wannan ne karo na farko da na ganewa idona yadda dabbar Panda take, tana iya motsi fiye da yadda na yi tsammani.”
Kazalika, wasu cikin matasan sun nuna cewa, akwai abubuwan gargajiya da na zamani dukka a lardin Sichuan, kuma jama’ar wurin suna da karamci da kirki sosai, al’amarin da ya sa ziyarar ta zama abu mai dadi da ba za su iya mantawa ba. (Murtala Zhang)
