Kimanin mako biyu kenan ana neman yaran su biyu, Garba Umar, mai kimanin shekaru 17 a duniya da kuma Sale Mu’azu, dukkanin su mazauna unguwar Tudun Wada Hadejia.
Yaran sun bata ne bayan da suka tafi kasuwar sayar da kifi da ke garin Hadejia a jihar Jigawa.
Garba Umar daya daga cikin yaran biyu da aka sace ya bayyanawa LEADERSHIP HAUSA cewa “Wani mutum ne ya dauke mu a mota a kasuwar kifi ya ce zamu yi masa aiki”.
Yace daga nan sai ya kai su wani gida inda ya daure su cikin wani daki mai duhu.
Garba yace suna cin abinci ba mai yawa ba, da kuma ruwan leda guda inda ake hada mutum biyu a ruwan leda daya domin su sha.
Mahaifiyar yaran ta ce sun shiga damuwa bayan batan yaran tsawon wannan lokaci.
Yaran sun dawo gida ne a yammacin ranar Lahadin karshen makonnan sun kuma bayyana cewa wani ne daga cikin su ya kubutar da su daga gidan inda suka tsere.
Kakakin rundunar ‘Yan sanda a jihar Jigawa, DSP Lawan Shisu Adam, ya ce, ba shi da masaniya kan batan yaran sai dai yace zai bincika don jin yadda abin yake.
Daga: Abdullahi Yawale Hadejia
