A daren ranar Asabar ne wasu ‘yan bindiga dadi suka kashe shugaban jam’iyyar APC na gundumar Asara da ke karamar hukumar Gwadabawa a jihar Sokoto, Alhaji Iliya Agajiba.
Sannan sun kuma kashe dan uwan Agajiba ta hanyar bude masa ruwan alburusai a lokacin da ya yi kokarin zuwa domin ceton dan uwansa a gidansa.
Wani mazaunin yankin, Malam Abdullahi Gwadabawa, ya shaida ma wakilinmu cewa, ‘yan bindigan sun shiga yankin ne da yawansu ya kai 15 dauke da muggan makamai inda suka farmaki kauyen Asara a daren ranar Asabar.
Ba a tabbatar da dalilin wannan kisan ba zuwa yanzu.
Sannan, wasu mutane daga yankin sun misalta wannan kisan da cewa kila daga abokan adawarsa ta siyasa ne, yayin da wasu kuma suke cewa hakan ya faru ne kawai sakamakon matsalolin masu garkuwa da mutane da ya addabi yankin tun da jimawa.
Karamar hukumar Gwadabawa ma daga cikin yankunan da ke fama da aikace-aikacen ‘yan fashin daji a gabashin Sokoto.
Wakilinmu ya kuma nakalto cewa masu binding sun sace shanu tare da yin awun gaba da wasu kadarori tare da wasu kudaden mamacin da na wasu al’ummomin yankin.
Duk kokarin Jin ta bakin jami’in watsa labarai na hukumar ‘yansandan jihar Sokoto, DSP Sunusi Abubakar hakan ya citura.
