Wasu ‘yan bindiga sun kai hari kauyen Tursa da ke karamar hukumar Rabah a jihar Sokoto da safiyar Talata.
Sai dai rahotanni sun tabbatar da cewa maharan sun kashe mutum daya sannan kuma sun yi awon gaba da wasu mutum shida.
- Sojoji Sun Kashe ‘Yan Fashin Daji Da Dama, Sun Kwato Makamai A Sokoto
- Rashin Tsaro: Gwamnatin Sokoto Ta Kafa Kwamitin Samar Da Jami’an Tsaron Jihar
Da aka tuntubi kakakin rundunar ‘yan sandan jihar Sokoto, ASP Ahmad Rufa’i, ya tabbatar da kai harin tare da yin garkuwa da mutanen kauyen.
ASP Rufa’i, ya kuma tabbatar da cewa lamarin ya faru ne da safiyar ranar Talatar nan, ya kuma kara da cewa, maharan sun shiga kauyen sun kona wasu sassa na kauyen tare da kashe wani mutum daya.
Ya kara da cewa, “An kuma kona babura biyu a yayin harin tare da yin garkuwa da mutane shida da sace wasu shanu da ba a bayyana adadinsu ba.
Kakakin ya tabbatar da cewa kwamishinan ‘yan sandan jihar, Ali Kaigama, ya bayar da umarnin farautar wadanda ake zargi da aikata laifukan.
