Rundunar ’Yansandan Jihar Katsina ta kama mutane 20 bisa zargin aikata fyaɗe da wasu laifuka, a wani yunƙurinta na rage laifuka a faɗin jihar.
Kakakin rundunar, DSP Abubakar Sadiq Aliyu, ya ce an samu jimillar laifuka 123, inda aka kai 108 gaban kotu, yayin da ake ci gaba da bincike a kan wasu 15.
- CMG Ya Gudanar Da Bikin Gabatar Da Nagartattun Shirye-Shiryensa A Kasashen Ketare
- ‘Yan Majalisar Kano 2 Sun Rasu A Rana Ɗaya
Ya ƙara da cewa kamen ya biyo bayan wani gagarumin samame da ’yansanda suka gudanar a faɗin jihar.
Samamen ya kai ga kama wasu da ake zargi da fashi da makami, kisan kai, safarar kuɗi da kuma laifukan da suka shafi ta’ammali da miyagun ƙwayoyi.
An kuma ƙwato makamai, harsasai, motoci, dabbobin sata, miyagun ƙwayoyi da wayoyin wutar lantarki da aka lalata.
Rundunar ta ce wannan mataki, na nuna ƙudirinta na kare al’umma, musamman mata da yara, a Jihar Katsina.
