Hukumar makamashin kasar Sin ta bayyana a jiya Litinin cewa, bisa sabon shirin shekaru 5 da aka fidda, yawan man fetur da iskar gas da kasar Sin za ta samar gaba daya a cikin gida zai kai kwatankwacin tan miliyan 440 ya zuwa shekarar 2030.
Hukumar makamashin kasar Sin da kwamitin kula da harkokin kwaskwarima da raya kasar Sin ne suka sanar da wannan shiri cikin hadin gwiwa, inda suka tsara shirin kafa sabbin bututun jigilar mai da iskar gas na tsawon kilomita dubu 20 ya zuwa shekarar 2030, inda hakan zai sa gaba daya tsawon bututun kasar a wannan fanni zai zarce kilomita dubu 220.
Haka zalika, bisa wannan sabon shirin da aka fidda, burin kasar Sin shi ne kara yawan iskar gas da take adanawa zuwa sama da kaso 13 bisa dari na yawan iskar gas da al’ummomin kasa suke amfani da shi.
Bugu da kari, an bayyana wasu muhimmin ayyukan da suka hada da gaggauta aikin binciken gonakin mai da na iskar gas, da samar da karin mai da iskar gas, da habaka ababen more rayuwa, da adana karin mai da iskar gas, da zurfafa hadin gwiwar dake tsakanin kasa da kasa, da gaggauta aikin kwaskwarima ta hanyar kare muhalli, da raya sabon karfin samar da hajoji da hidimomi masu karko, da inganta kirkire-kirkiren kimiyya da fasaha, da kuma zurfafa aikin kwaskwarima kan ayyuka masu nasaba da mai da iskar gas, da dai sauransu. (Mai Fassara: Maryam Yang)
