Daraktan Kwamitin Yaƙin Neman Zaɓen Shugaban Ƙasa na jam’iyyar APC, Abdulaziz Yari, ya ce ya kamata ’yan Nijeriya masu ƙwazo su iya samun abinci, kasancewar ana sayar da abinci a kasuwanni.
Yari ya bayyana hakan ne a ranar Juma’a yayin gangamin APC na neman sake zaɓen Shugaba Bola Tinubu a shekarar 2027, wanda aka gudanar a filin wasa na Godswill Akpabio da ke Uyo, Jihar Akwa Ibom.
Ya amince cewa akwai yunwa a ƙasar, amma ya tambayi ko akwai mutanen da suka je kasuwa da kuɗi suka kasa samun abincin da za su saya.
Ya yi iƙirarin cewa duk mutumin da ba malalaci ba ne, ya kamata ya iya samun abincin da zai ci.
Wannan furuci na Yari na zuwa ne a daidai lokacin da ake fama da hauhawar farashin kayan abinci da matsin tattalin arziƙi a faɗin Nijeriya.
A baya, Shugaba Tinubu ya ɗora alhakin yunwa da talauci a ƙasar kan gwamnatocin baya da ’yan adawa.
Sai dai tsohon Mataimakin Shugaban Ƙasa, Atiku Abubakar, ya soki kalaman Tinubu, yana mai cewa manufofin gwamnatin yanzu ne suka haddasa matsin tattalin arziƙin da ’yan Nijeriya ke fuskanta.
