A yau Juma’a 6 ga wannan wata, kakakin ma’aikatar harkokin wajen kasar Sin Guo Jiakun ya jagoranci taron manema labarai, inda aka yi masa tambaya game da labarin da mujallar Forbes ta bayar na kwatanta manufofin Sin da na Amurka da aka aiwatar a nahiyar Afirka.
Da yake bayar da amsa, Guo Jiakun ya bayyana cewa, kasar Sin da kasashen Afirka suna da makomar bai daya. Kuma kasar Sin tana nacewa wajen bin ra’ayin tabbatar da gaskiya da zumunci da kusanci da aminci da kasashen Afirka, da kuma goya musu baya wajen samun ci gaba da farfadowa da kuma hadin gwiwa don su zama masu dogaro da kansu.
Ban da wannan kuma, game da sabbin takunkumai da ma’aikatar harkokin wajen kasar Amurka ta sanar da kakaba wa kasar Cuba a ‘yan kwanakin baya, tare da shigar da kamfanonin Sin biyu cikin jerin sunayen kamfanonin da za a saka wa takunkumin, Guo Jiakun ya bayyana cewa, kasar Sin ba ta amince da yunkurin kasar Amurka na kawo cikas ga hadin gwiwar dake tsakaninta da Cuba ba.
Game da dangatakar dake tsakanin Sin da Japan kuma, Guo Jiakun ya bayyana cewa, ya kamata bangaren Japan ya gyara kuskurensa kan batun yankin Taiwan cikin hanzari, kuma ya dauki ra’ayi mai dacewa kan batutuwan tarihi, da kuma nuna adalci da gaskiya wajen fahimtar kasar Sin.
Kazalika ma’aikatar harkokin wajen kasar Sin ta sanar da cewa, za a gudanar da taron tattaunawa karo na biyu, kan tattalin arziki da harkokin kudi tsakanin Sin da Canada a ranar 9 ga wannan wata a kasar Canada, kuma mataimakin firaministan kasar Sin He Lifeng, zai shugabanci taron tare da jami’an bangaren kasar Canada. (Zainab Zhang)
