Tsohon Mataimakin Shugaban Ƙasa, Atiku Abubakar, ya bayyana cewa babu wani hukuncin kotu, ko barazana ko matsin lambar siyasa da zai sa ya janye daga takarar shugaban ƙasa a zaɓen 2027. Atiku, wanda ya samu tikitin takarar shugaban ƙasa na jam’iyyar ADC, ya ce zai kasance cikin ƴan takarar da za su bayyana a katin zaɓe, duk da hukuncin Babbar Kotun Tarayya da ya soke shugabancin jam’iyyar ƙarƙashin Sanata David Mark.
Atiku ya bayyana matsayarsa ne cikin wata sanarwa da ya fitar ranar Juma’a, 6 ga Nuwamba, 2026, a Sakkwato, inda ya ce ba zai bari wani mataki na shari’a ko dabarun siyasa su hana ƴan Nijeriya zaɓar shugabannin da suke so ba. Ya jaddada cewa zai ci gaba da yaƙin neman zaɓensa, yana mai cewa: “Ina cikin wannan takara, ba zan janye ba, kuma za mu kasance a katin zaɓe.”
Tsohon mataimakin shugaban ƙasar ya zargi gwamnatin Shugaba Bola Tinubu da amfani da matsin lambar siyasa da matakan shari’a domin raunana jam’iyyun adawa da kuma ƙoƙarin mayar da Nijeriya ƙasa mai jam’iyya guda. Ya kuma yi zargin cewa akwai yunƙurin yin maguɗi a rajistar masu zaɓe ta hanyar amfani da hotunan da aka ƙirƙira da fasahar AI, da sunayen ƙarya da bayanan mutanen da ba su wanzu. Sai dai bai gabatar da hujjoji a cikin sanarwar da ke tabbatar da waɗannan zarge-zarge ba.
Atiku ya kuma soki manufofin tattalin arziƙin gwamnatin Tinubu, musamman cire tallafin man fetur, da faɗuwar darajar Naira, da hauhawar farashin abinci da man fetur, da rufe masana’antu da ƙananan sana’o’i. Ya ce matsalar tsaro, musamman ayyukan ƴan bindiga da masu garkuwa da mutane, na ƙara jefa al’umma cikin wahala. Ya yi kira ga magoya bayansa da kada su karaya, yana mai cewa ƙuri’unsu ne za su iya sauya shugabancin ƙasar.
Jawabin Atiku ya biyo bayan hukuncin Mai Shari’a Peter Lifu na Babbar Kotun Tarayya da ya soke shugabancin ADC ƙarƙashin David Mark da matakan da suka ɗauka, ciki har da zaɓen fidda gwani da ya samar da takarar Atiku. ADC ta ƙi amincewa da hukuncin, ta kuma ɗaukaka ƙara zuwa Kotun Ɗaukaka Ƙara tare da neman dakatar da aiwatar da hukuncin.
A nata ɓangaren, jam’iyyar APC ta musanta zargin cewa tana da hannu a rikicin ADC, yayin da Ministan Sufurin Jiragen Sama, Festus Keyamo, ya ce ba abin da zai girgiza ƙasar idan Atiku bai samu shiga katin zaɓen 2027 ba.
