Jam’iyyar APC ta bayyana cewa manyan jiga-jigan ƴan adawa da suka haɗa da tsohon Mataimakin Shugaban Ƙasa Alhaji Atiku Abubakar, da Peter Obi, da Donald Duke, da Gwamna Seyi Makinde na Jihar Oyo, ba za su taɓa iya yin kan-kan-kan da Shugaba Bola Ahmed Tinubu ba a zaɓen shugaban ƙasa na 2027. Jam’iyyar ta jaddada cewa idan aka auna cancanta, da tarihin ayyuka, da kafa cibiyoyin ci gaban ƙasa, babu wata jam’iyyar adawa da ke da ɗan takarar da ya isa ya ƙalubalanci Shugaba Tinubu a akwatin zaɓe.
Da yake jawabi a shalƙwatar jam’iyyar ta ƙasa da ke Abuja, shugaban jam’iyyar APC, Dr. Nentawe Yilwatda, ya ƙalubalanci ƴan adawar da su fito da kundin ayyukan da suka taɓa yi a baya domin gwada su da na Tinubu. Ya caccaki jam’iyyun adawa musamman PDP, inda ya bayyana cewa a zamanin mulkin Obasanjo da Atiku an ware sama da Naira biliyan 300 domin ayyukan hanyoyi amma har yau ba a ga ainihin hanyoyin da aka gyara da kuɗin ba, sabanin gwamnatin Tinubu da ke nuna ayyuka a ƙasa a zahiri.
Yilwatda ya lissafa manyan ayyukan more rayuwa da gwamnatin Tinubu ta kammala ko kuma suke kan gudana a matsayin kwararan hujjoji, ciki har da aikin babbar hanyar Abuja zuwa Kaduna da Kano mai tsawon kilomita 441 wanda ke daf da kammala, da aikin babban titin Trans-Sahara Superhighway mai tsawon kilomita sama da 1,400 wanda aka yi kusan kashi 30 zuwa 40 nasa, da aikin hanyar bakin teku ta Lagos-Calabar, gami da babban aikin bututun iskar gas na AKK (Ajaokuta-Kaduna-Kano) da zai tallafa wa wutar lantarki, masana’antu, da takin zamani.
Haka kuma, jigon na APC ya caccaki masu sukar shirin lamunin karatu na ɗalibai (NELFUND) da tsare-tsaren tallafin gwamnati, inda ya bayyana cewa ƴan adawa sun nesanta kansu da ainihin raɗaɗin da talakawan ƙasar ke ciki. Ya yi nuni da cewa wasu daga cikin masu sukar gwamnatin na da jami’o’i masu zaman kansu da suke karɓar kuɗin makaranta na miliyoyin Nairori, amma a gefe guda suna kushe shirin lamunin karatu na gwamnati wanda har ɗaliban da ke karatu a jami’o’insu na kashin kai ke amfana da shi.
A ƙarshe, Yilwatda ya buƙaci magoya bayan jam’iyyar da ƴan takara da kada su karaya wajen fuskantar ƙalubale, yana mai nuni da cewa APC na da mambobin kwamitocin zartarwa (excos) sama da 261,000 a faɗin ƙasar. Ya jaddada cewa idan jam’iyyar ta haɗa ƙarfi da ƙarfe tare da mayar da wannan tarin jiga-jigai zuwa aikin haɗin gwiwa a fagen kamfe, samun gagarumar nasara ga Shugaba Tinubu a zaɓen 2027 abu ne tabbatacce.
