Hukumar kwallon kafa ta kasar Argentina ta sanar da shirin girmama Lionel Messi a wasannin wannan makon ta hanyar dakatar da wasanni a minti na 10 na kowane wasa a kasar, domin ‘yan kallo tare da ‘yan ƙwallo su yi tafi na minti daya, a wani yunkuri da hukumar ke yi wajen nuna girmamawa ga re shi, a yayin da ya bayyana ritayarsa daga bugawa kasar Argentina kwallo a Makon daya gabata.
Messi ya tabbatar da cewa rashin nasarar Argentina a gasar cin kofin Duniya na shekarar 2026 a hannun Spain shine wasansa na karshe a tawagar kasar.
Hukumar kwallon kafa ta kasar Argentina (AFA) ta ce, “Za mu nuna girmamawa ga Lionel Messi a lokacin wasanni a dukkan gasannin maza da mata a kasar, inda za a dakatar da wasanni a minti na 10 na kowane wasa domin nuna godiya ga gudunumawar da Lionel Messi ya bai wa tawagar kwallon kafa ta Argentina.”
Messi ya fara bugawa Argentina wasa na farko a shekarar 2005, inda ya zama dan wasa mafi zura kwallaye a tarihin kasar bayan kwallaye 125 da yaci.
Ya wakilci Argentina a gasar cin kofin Duniya sau 6 inda ya lashe kofin a shekarar 2022, wanda ya kawo karshen jiran shekaru 36 da kasar ta shafe ba tare da lashe kofin ba.
Dan wasan mai shekaru 39, yana rike da tarihin dan wasan da yafi buga wasanni a Gasar Cin Kofin Duniya inda ya buga wasanni 34.
Da yake sanar da ritayarsa a shafin Instagram, Messi ya rubuta cewa “Na bayarda komai da zan iya bayawarwa ga tawagar Argentina, ba ni da abin da ya rage da zan bayar a halin yanzu.
“Shawarar da na yanke tana da matukar wahala amma na fahimci cewa yanzu lokaci ya yi da zan jingine taka leda a tawagar kasa”.
