Rundunar ‘yansandan jihar Bauchi ta kama wasu mutane huɗu da ake zargi da kashe wani mutum mai shekaru 45 a duniya, Garba Abdullahi, bayan an zargesa da maita a ƙauyen Dunari da ke gundumar Atahowa, ƙaramar hukumar Itas/Gadau ta jihar.
A cewar ‘yansandan, a ranar 22 ga Satumba, 2026, wani mazaunin ƙauyen Dunari mai shekaru 35 ya kai rahoto ofishin ‘yansanda na Gadau, inda ya bayyana cewa an kai wa ɗan uwansa, Garba Abdullahi, hari a kan hanyarsa ta dawowa gida daga gona.
Mai kai ƙorafin ya ce mutane huɗu ne suka kai wa ɗan uwan nasa harin, inda suka zarge shi da maita a kan wata mata mai suna Sawaida Dahiru da ya janyo mata rashin lafiya.
‘Yansanda sun bayyana waɗanda ake zargin da Shitu Dahiru, mai shekaru 25; Magaji Dahiru, mai shekaru 42; Sabi’u Auwalu, mai shekaru 20; da Abbah Abdulzahar, mai shekaru 19.
An zargi mutum huɗun da cewa sun daɓa wa Abdullahi wuƙa tare da sara masa adda a sassa daban-daban na jikinsa, lamarin da ya sa ya suma.
A cikin sanarwa da Kakakin Rundunar ‘yansandan Jihar Bauchi, SP Nafiu Habib, ya fitar a ranar Laraba, ya ce bayan samun rahoton, jami’an ’yansanda sun garzaya wurin da lamarin ya faru, inda suka ɗauki wanda aka jikkata zuwa babban asibitin Azare domin samun kulawar gaggawa.
Ya ce daga bisani, likita ya tabbatar da mutuwar Abdullahi, sannan aka miƙa gawarsa ga ’yan uwansa domin yi masa jana’iza.
